in

ఇకపై డ్రైవింగ్ లైసెన్స్ కోసం అప్లై చేయాల్సిన పని లేదు, పోలీసులకి దొరికిపోతే చాలు

ట్రాఫిక్ పోలీసులు అడ్డగిస్తే.. చలాన్లు విధిస్తారేమోనని కంగారు పడొద్దు. ఎందుకంటే హైదరాబాద్‌లో పోలీసుల తీరు మారింది. చలాన్లకు బదులు లైసెన్సులు ఇప్పిస్తున్నారు. హెల్మెట్లు లేని వారితో వాటిని కొనిపిస్తున్నారు. కొద్ది రోజులుగా వినూత్న కార్యక్రమాలు చేపడుతున్న ట్రాఫిక్ పోలీసులు శనివారం (సెప్టెంబర్ 14) మరో కార్యక్రమానికి శ్రీకారం చుట్టారు. రాచకొండ కమిషనరేట్ పరిధిలో ఈ వినూత్న ప్రయత్నం చేశారు. డీజీపీ, రాచకొండ సీపీ ఆదేశాల ప్రకారం ట్రాఫిక్‌ నిబంధనలు ఉల్లంఘించే వారి విషయంలో కీలక నిర్ణయం తీసుకున్నట్లు పోలీసు అధికారులు వెల్లడించారు.

ఈ కార్యక్రమంలో భాగంగా వాహనదారులకు చలాన్లు విధించకుండా నిబంధనలకు అనుగుణంగా వారికి ఉండాల్సిన డ్రైవింగ్ లైసెన్సులు, రిజిస్ట్రేషన్ పత్రాలను మంజూరు చేయిస్తామని రాచకొండ ట్రాఫిక్‌ డీసీపీ దివ్యచరణ్‌ రావు తెలిపారు. ఉప్పల్‌ రింగ్‌ రోడ్డు వద్ద శనివారం వాహనదారులకు అవగాహన కార్యక్రమం నిర్వహించారు.

హెల్మెట్‌ లేని బైకర్లతో అక్కడికక్కడే హెల్మెట్ కొనిపించారు. డ్రైవింగ్‌ లైసెన్సులు, ఇన్సూరెన్స్‌, పొల్యూషన్‌ తదితర సర్టిఫికెట్లు లేకుంటే వెంటనే జారీ చేసేలా చర్యలు తీసుకున్నారు. సంబంధిత విభాగాల అధికారులతో మాట్లాడి సమన్వయం చేశారు.

లైసెన్సులు లేనివారికి పోలీసులు అప్పటికప్పుడే స్లాట్ బుక్ చేయించారు. ట్రాఫిక్ నిబంధనలను తు.చ. తప్పకుండా పాటిస్తున్న వాహనదారులకు సినిమా టికెట్లను బహుమతిగా ఇచ్చి హైదరాబాద్ పోలీసులు ఇప్పటికే అందరి దృష్టిని ఆకర్షించిన విషయం తెలిసిందే.

వాహనాలు నడిపే వారు ట్రాఫిక్ నిబంధనలను తు.చ. తప్పకుండా పాటిస్తే ప్రమాదాల బారిన పడకుండా ఉంటారని పోలీసులు సూచించారు. ఈ కార్యక్రమంలో ఏసీపీలు అందే శ్రీనివాస్, పి శ్రీనివాస్, ఎం శంకర్, రాచకొండ పరిధిలోని ట్రాఫిక్ సీఐ, ఎస్సైలు పాల్గొన్నారు.

What do you think?

Written by telugucircles

Leave a Reply

Your email address will not be published.

కుక్కపిల్ల మీద ఉన్న సోయి.. తెలంగాణ బిడ్డల మీద లేకపాయే

కేసీఆర్ ఒక మాట, కేటీఆర్ ఇంకో మాట