Breaking News :

తెలంగాణ పోలీసులకు మద్దతుగా సోషల్ మీడియా

ప్రియాంక రెడ్డికు నరకం చూపించిన నిందితులు ఎన్‌కౌంటర్‌లో హతమయ్యారనే వార్త వినగానే చాలా మంది గుండెలు ఉప్పొంగాయి. న్యాయం జరిగిందని సంబురాలు చేసుకున్నారు. తెలంగాణ పోలీసులపై పూలవర్షం కురిపించారు. ప్రశంసలతో ముంచెత్తారు. ‘సాహో సజ్జనార్..’ అంటూ సోషల్ మీడియా హోరెత్తింది. చాలా మంది అమ్మాయిలు, మహిళలు తమ కుటుంబసభ్యురాలికే న్యాయం జరిగినట్లుగా భావించి వీధుల్లోకి వచ్చి డ్యాన్సులు చేశారు. స్వీట్లు పంచిపెడుతూ హర్షం వ్యక్తం చేశారు. పోలీసులకు రాఖీలు కట్టారు. సజ్జనార్ టీం చర్యకు ప్రపంచవ్యాప్తంగా ప్రశంసలు దక్కాయి. హైదరాబాద్ ఎన్‌కౌంటర్ వార్త ఇంటర్నేషనల్ మీడియాలో పతాక శీర్షికైంది.

ఇంతవరకూ బాగానే ఉండొచ్చు. ఇప్పుడే అసలు చిక్కొచ్చింది. పోలీసుల చర్యను తప్పుబడుతూ షాద్‌నగర్ ఎన్‌కౌంటర్‌పై ఓ స్వరం గొంతెత్తి అరుస్తోంది. ఆ స్వరం పేరు.. ‘మానవ హక్కులు’. ఎన్‌కౌంటర్ పేరుతో మానవ హక్కులను హరించారని.. నలుగురు నిందితులను నిర్దాక్షిణ్యంగా కాల్చి చంపారని పలువురు ఆరోపిస్తున్నారు. ప్రపంచంలో మెజార్టీ ప్రజలు మెచ్చిన చర్యను తీవ్రంగా తప్పుబడుతున్నారు. తెలంగాణ పోలీసులపై లెక్కకుమిక్కిలి కేసులు నమోదవుతున్నాయి. జాతీయ మానవ హక్కుల సంఘం సుమోటోగా కేసు నమోదు చేసి ఎన్‌కౌంటర్‌పై సమగ్ర దర్యాప్తు చేపట్టింది. విచారణ చేపట్టే వరకు మృతదేహాలను భద్రపరచాలని అటు తెలంగాణ హైకోర్టు ఆదేశించింది.

ఇప్పుడు పోలీసుల పరిస్థితి ఏంటి? ఎన్‌కౌంటర్ తర్వాత జనం చేత జేజేలు కొట్టించుకున్న తెలంగాణ పోలీసులు ఇక కోర్టుల చుట్టూ తిరగాల్సిందేనా..? చిక్కులు ఎదుర్కోవాల్సిందేనా? ప్రియాంక రెడ్డి కేసు నిందితులను ఎన్‌కౌంటర్ చేయాలని నిన్నటివరకూ నినదించిన జనం.. ఈ పోలీసులకు ఇప్పుడు ఏ మేరకు మద్దతిస్తారు? ప్రస్తుతం హాట్ టాపిక్‌గా మారిన అంశమిది.. ప్రియాంక రెడ్డి ఘటన తర్వాత ప్రభుత్వం, పోలీసుల తీరును తప్పుబడుతూ పెద్ద ఎత్తున ఆందోళనలు చేసింది జనమే. మానవ హక్కులంటూ ఇప్పుడు పోలీసుల తీరును తప్పుబడుతున్నవాళ్లూ.. ఆ జనంలోంచి వచ్చినవారే. ఇంతటి దారుణానికి కారణమైన రాక్షసులను ఎన్‌కౌంటర్‌లో కాల్చి చంపితే.. పోలీసులపై కేసులు వేయడం చాలా మందిని విస్మయానికి గురిచేస్తోంది.

ఇక్కడే మరో ప్రశ్న.. మానవ హక్కులు నిందితులకే వర్తిస్తాయా? బాధితురాలి హక్కులు ఆ కాళరాత్రిలో నిర్దాక్షిణ్యంగా హరించలేదా? 25 ఏళ్ల నిండు జీవితాన్ని బుగ్గి పాలు చేయలేదా? ఎన్నో కష్టాలకోర్చి ఎంతో జాగ్రత్తగా నిర్మించుకున్న కలల సౌదాన్ని చీకట్లో కాల్చి బూడిద చేయలేదా? ఆ తల్లిదండ్రులకు తీరని గుండె కోత మిగల్చలేదా? ఇవన్నీ హక్కులు కావా? అప్పుడు లేవని నోళ్లు.. ఇప్పుడే ఎందుకు స్వరం పెంచాయి? ఉన్నావ్‌లో మృగాళ్ల చేతిలో దారుణంగా అత్యాచారానికి గురై కోర్టుల ద్వారా న్యాయం కోసం పోరాడుతున్న బాధితురాలిని నడిరోడ్డుపై నిప్పు పెట్టి సజీవదహనం చేస్తే ఈ గొంతులన్నీ ఎక్కడికెళ్లాయి? దిశ కుటుంబ సభ్యులు ఆవేదనతో అడుగుతున్న ప్రశ్నలివి.

ఈ ప్రశ్నలకు సో కాల్డ్ మానవ హక్కులు ఏం సమాధానం చెబుతాయి? ఇదిలా ఉంటే.. సోషల్ మీడియాలో మాత్రం ఓ వర్గం నుంచి తెలంగాణ పోలీసులకు గట్టి మద్దతు లభిస్తోంది. పోలీసులపై కేసులు వేసిన వారి దుమ్ము దులుపుతున్నారు. ప్రియాంక రెడ్డికు అన్యాయం జరిగినప్పుడు మీరంతా ఎక్కడున్నారని సూటిగా ప్రశ్నిస్తున్నారు. ఇప్పటికైనా అలాంటి వాళ్లంతా కళ్లు తెరవాలని మండిపడుతున్నారు. మహిళల భద్రత, వారిపై దారుణాల విషయంలో చాలా చిక్కుముళ్లను విప్పిన ఆ ‘దిశే’.. మానవ హక్కుల ఉల్లంఘన విషయంలోనూ ఓ దిశ చూపుతుందా?

Read Previous

అగ్నిప్రమాదంపై ప్రధాని మోదీ దిగ్బ్రాంతి

Read Next

ఢిల్లీ మెట్రో రైల్లో రొమాన్స్