వీడియో: బంజారాహిల్స్ పోలీస్ స్టేషన్‌లోనే రేప్ చేయబోయారు, హైదరాబాద్ పోలీసులపై భార్య భర్తల ఆరోపణలు

ఓ వివాదంపై ఫిర్యాదు చేసేందుకు వెళ్తే పోలీసులు తన భర్తను తీవ్రంగా కొట్టి తనపై అత్యాచారం చేయబోయారంటూ బంజారాహిల్స్‌ పోలీసులపై తీవ్ర ఆరోపణలు చేశారు అట్లూరి ప్రవిజ అనే మహిళ. డిసెంబర్ 8వ తేదీన బంజారాహిల్స్ సీఐ కళింగరావు, ఎస్ఐ రాంబాబు, డీఐ రవికుమార్, ఎస్ఐలు వీడీ నాయుడు, రామిరెడ్డి తనపై పోలీస్‌స్టేషన్‌లోనూ తనపై అత్యాచారయత్నం చేశారని ఆరోపిస్తున్నారు. బంజారాహిల్స్‌ పోలీసుల చేతిలో తమకు జరిగిన అవమానాన్ని అందరికీ తెలియజెప్పేందుకు ప్రవిజ, తన భర్త సురేశ్‌తో కలిసి 15 నిమిషాల నిడివి గల వీడియో సోషల్‌మీడియాలో పోస్ట్ చేశారు. ప్రస్తుతం ఆ వీడియో వైరల్‌గా మారింది.
పోలీసులు భర్తను కొట్టి నన్ను రేప్ చేయబోయారు..

‘ఓ వివాదంపై ఫిర్యాదు చేసేందుకు డిసెంబర్ 3వ తేదీన నా భర్త సురేశ్‌తో కలిసి బంజారాహిల్స్ పోలీస్‌స్టేషన్‌కు వెళ్లాను. అక్కడ ఫిర్యాదు రాసి ఎస్ఐ వీడీ నాయుడికి ఇస్తుండగా మరో ఎస్ఐ వచ్చి నన్ను ప్రాస్టిట్యూట్ అంటూ అసభ్యంగా మాట్లాడాడు. నేను రాసి ఇచ్చిన ఫిర్యాదు చూసి బండబూతులు తిట్టాడు. దీనిపై నేను హైదరాబాద్ పోలీస్ కమిషనర్ అంజనీకుమార్‌కు ఫోన్ చేసి చెబితే… తన కార్యాలయానికి వచ్చి ఫిర్యాదు చేస్తే వారిపై చర్యలు తీసుకుంటానని చెప్పారు. ఈ విషయం తెలుసుకున్న బంజారాహిల్స్ ఏసీపీ అదేరోజు సాయంత్రం నా భర్తకు ఫోన్ చేసి సీపీ వద్దకు వెళ్లొద్దని, సీఐ కళింగరావు సెలవుపు ఉన్నారని, ఆయన ఐదో తేదీన వచ్చి మీ సమస్య పరిష్కరిస్తారని చెప్పారు. దీంతో మేం సీపీ వద్దకు వెళ్లలేదు.

డిసెంబర్ 8వ తేదీన పోలీసుల పిలుపు భర్తతో మేరకు కలిసి సాయంత్రం సమయంలో బంజారాహిల్స్‌ పోలీస్‌స్టేషన్‌కు వెళ్లాం. అక్కడ పోలీసులు మమ్మల్ని ఫస్ట్‌ఫ్లోర్‌లో సీసీ కెమెరాలు లేని చోటికి తీసుకెళ్లి ఫోన్, హ్యాండ్‌బ్యాగ్ లాక్కున్నారు. అక్కడ సీఐ కళింగరావు సమక్షంలో నాపై లైంగిక వేధింపులకు పాల్పడ్డారు. నా భర్తను కొడుతూ నాపై అత్యాచారానికి యత్నించారు. అనరాని మాటలు అంటూ తీవ్రంగా హింసించారు. వారి నుంచి తప్పించుకునే క్రమంలో ప్రతిఘటించడంతో పలువురు పోలీసులకు స్వల్ప గాయాలయ్యాయి. దీంతో తామే వారిపై దాడికి పాల్పడినట్లు కేసు పెట్టి అరెస్ట్ చేశారు’ అని ప్రవిజ తెలిపారు.

పోలీసు శాఖలో సివిల్ సెటిల్‌మెంట్లకు అలవాటు పడిన పోలీసుల వల్లే తమకు ఈ పరిస్థితి వచ్చిందని ప్రవిజ భర్త సురేశ్‌ ఆరోపించారు. బెయిల్ వచ్చిన తమపై పోలీసులు నిఘా పెట్టారని, ఎక్కడికి వెళ్లినా వెంటాడుతున్నారని తెలిపారు. పోలీసు శాఖలో ఉన్నతాధికారులు, ప్రభుత్వం తమకు జరిగిన అన్యాయంపై స్పందించి న్యాయం చేయాలని వేడుకుంటున్నారు. ఈ వివాదం ముగిసేవరకు తమకు రక్షణ కల్పించాలని పోలీసులకు రిక్వెస్ట్ చేస్తున్నారు.

కొత్త వార్తలు

సినిమా

రాజకీయం