బంగారం రేటు ఎందుకు తగ్గిందో తెలుసా?

22

బంగారం ధర బలహీనమైన ట్రెండ్‌లోనే కొనసాగుతోంది. బుధవారం కూడా పడిపోయింది. దీంతో బంగారం ధర ఏడు రోజులుగా తగ్గుతూనే వస్తోంది. అంతర్జాతీయ మార్కెట్‌లో పసిడి ధర దిగిరావడం సహా అమెరికా డాలర్‌తో పోలిస్తే ఇండియన్ రూపాయి బలపడటంతో దేశీయంగా బంగారం ధరపై ఒత్తిడి నెలకొంది.

రూ.2,350 పతనం

ఎంసీఎక్స్ మార్కెట్‌లో గోల్డ్ ఫ్యూచర్స్ కాంట్రాక్ట్స్ ధర ఈ రోజు 0.20 శాతం క్షీణతతో 10 గ్రాములకు రూ.37,647కు తగ్గింది. బంగారం ధర సెప్టెంబర్ నెల ఆరంభంలో 10 గ్రాములకు ఏకంగా రూ.40,000 మార్క్‌కు చేరింది. అప్పటితో పోలిస్తే ఇప్పుడు బంగారం ధర ఏకంగా రూ.2,350 పడిపోయింది. వెండి ధర కూడా బంగారం బాటలోనే నడుస్తోంది. కేజీ వెండి ధర 0.40 శాతం క్షీణతతో రూ.44,262కు తగ్గింది.

ధరపై ఒత్తిడి

‘బంగారం ధరపై ఒత్తిడి కొనసాగుతోంది. పసిడి ధర 10 గ్రాములకు రూ.37,780 స్థాయికి కింద ఉన్నంత వరకు బలహీనమైన ట్రెండే కొనసాగవచ్చు. బంగారం ధరకు ఇంట్రాడేలో రూ.37,650, రూ.37,560, 37,470 స్థాయిల వద్ద మద్దతు లభించింది. ధరలు రూ.38,300-350 స్థాయిని బ్రేక్ చేయాల్సి ఉంది. అప్పుడే నెగటివ్ ట్రెండ్ తగ్గుతుంది’ అని జియోజిత్ ఫైనాన్షియల్ సర్వీసెస్ కమోడిటీ రీసెర్చ్ హెచ్ హరీశ్ వీ తెలిపారు.

గ్లోబల్ మార్కెట్‌లోనూ ఇదే ట్రెండ్

అంతర్జాతీయ మార్కెట్‌లో బంగారం ధరలు 0.10 శాతం క్షీణతతో ఔన్స్‌కు 1459.91 డాలర్లకు దిగొచ్చింది. గత సెషన‌లో పసిడి ధర ఔన్స్‌కు 1450.3 డాలర్ల రెండు వారాల కనిష్ట స్థాయిని తాకిన విషయం తెలిసిందే. అమెరికా, చైనా మధ్య వాణిజ్య ఒప్పందానికి సంబంధించిన తొలి డీల్ ఓకే కావొచ్చనే అంచనాలు నెలకొన్నాయి. దీంతో గ్లోబల్ ఈక్విటీ మార్కెట్లు కూడా ర్యాలీ చేస్తున్నాయి. దీంతో బంగారం ధరపై నెగటివ్ ప్రభావం పడింది.

డీల్ ఓకే అయితే మరింత పడిపోనున్న పసిడి?

అమెరికా, చైనా మధ్య వాణిజ్య డీల్ అంశానికి సంబంధించిన వార్తలు స్వల్ప కాలంలో బంగారం ధరపై ప్రభావం చూపుతాయని హరీశ్ తెలిపారు. ‘ఇరు దేశాల మధ్య ఒప్పందం ఓకే అయినట్లు ఎలాంటి వార్తలు వెలువడినా కూడా ఆర్థిక మందగమన భయాలు తొలగిపోతాయి. దీంతో మార్కెట్ సెంటిమెంట్ బలపడుతుంది. ఆర్థిక వ్యవస్థపై సానుకూల అంచనాలు బంగారం డిమాండ్‌పై ప్రతికూల ప్రభావం చూపుతాయి. దీంతో పసిడి ధర దిగివస్తుంది. డాలర్ బలపడటం, బంగారాన్ని ఎక్కువగా వినియోగిస్తున్న దేశాల నుంచి డిమాండ్ తగ్గడం వంటి అంశాల వల్ల కూడా పసిడిపై నెగటివ్ ఎఫెక్ట్ పడుతుంది’ అని వివరించారు.

తగ్గిన దిగుమతులు

కానీ భౌగోళిక రాజకీయ ఉద్రిక్తతల వల్ల బంగారం ధరకు కింది స్థాయిల్లో మద్దతు లభించే అవకాశముందని మార్కెట్ నిపుణులు పేర్కొంటున్నారు. చైనాలో బంగారం దిగుమతులు 2017 జనవరి నాటి కనిష్ట స్థాయికి పడిపోయాయి. ప్రపంచంలో బంగారం ఎక్కువగా వినియోగిస్తున్న దేశం చైనా. దీని తర్వాతి స్థానంలో భారత్ ఉంది. వృద్ధి భయాలు, ద్రవ్యోల్బణ పెరుగుదల వంటి అంశాల నేపథ్యంలో చైనాలో పసిడి దిగుమతులు తగ్గాయి.

ఆరేళ్ల గరిష్టం నుంచి..

గ్లోబల్ మార్కెట్‌లో బంగారం ధర గత నెలల్లో ఏకంగా ఆరేళ్ల గరిష్ట స్థాయి (ఔన్స్‌కు 1,550 డాలర్లకు) చేరిన విషయం తెలిసిందే. అమెరికా, చైనా మధ్య నెలకొన్ని వాణిజ్య ఉద్రిక్తతలు ఇందుకు కారణం. అయితే అప్పటితో పోలిస్తే ఇప్పుడు బంగారం ధర కింది స్థాయిల్లోనే కదలాడుతోంది.

ఫెడ్ ఎఫెక్ట్

అమెరికా ఫెడరల్ మరోవైపు వడ్డీ రేట్ల కోతకు సుముఖంగా లేకపోవడం కూడా బంగారం ధరపై ప్రభావం చూపుతోంది. ఫెడ్ ఇప్పటికే వడ్డీ రేట్లును ఈ ఏడాది మూడుసార్లు తగ్గించేసింది. తదుపరి రేట్ల కోత ఉండదని సంకేతాలిచ్చింది. దీంతో బంగారంపై ప్రతికూల ప్రభావం పడింది. వడ్డీ రేట్లు తగ్గితే బంగారానికి డిమాండ్ పెరుగుతుంది.

దేశంలో 19 శాతం పరుగు

దేశీ మార్కెట్‌లో బంగారం ధర ఈ ఏడాది దాదాపు 19 శాతం పరుగులు పెట్టింది. సెప్టెంబర్ నెల ఆరంభంలో బంగారం ధర ఎంసీఎక్స్ మార్కెట్‌లో 10 గ్రాములకు ఏకంగా రూ.40,000 మార్క్ పైకి చేరింది. వెండి ధర కూడా కేజీకి ఏకంగా రూ.50 వేల మార్క్‌కు ఎగసింది. అయితే మళ్లీ బంగారం ధర ఆ స్థాయికి వెళ్లలేదు.