తెలంగాణ కొత్త సచివాలయ నిర్మాణం వాళ్ళ చేతికి వెళ్ళిపోయింది
Timeline

తెలంగాణ కొత్త సచివాలయ నిర్మాణం వాళ్ళ చేతికి వెళ్ళిపోయింది

తెలంగాణ లో నూతన సచివాలయ నిర్మాణం చేసి తీరాల్సిందే అని కంకణం కట్టుకొని కూర్చున్నారు ముఖ్యమంత్రి కెసిఆర్. ప్రతిపక్షాల నుండి ఎన్ని విమర్శలు వచ్చినా సరే వాటిని పట్టించుకోవట్లేదు అధికార పార్టీ నేతలు . కొత్త సచివాలయ నిర్మాణానికి కావాల్సిన వాటి కోసం ఇప్పటి వరకు జరగాల్సిన మీటింగులన్నీ యుద్ధ ప్రాతిపదికన చేసేసారు కెసిఆర్.

అయితే ఈ కొత్త సచివాలయ నిర్మాణ పనులు కూడా కెసిఆర్ మిత్ర వర్గం అయినా మై హోమ్ రామేశ్వర్ రావు & మెగా కంపెనీ చేతికే ముట్ట జెప్పుతారని అందరు భావించారు. వాళ్లకు లాభం చేయడానికే దాని బడ్జెట్ కూడా పెంచేశారు అంటూ వార్తలు కూడా షికారు చేసాయి. కానీ ఈ నిర్మాణ పనుల కొసం నిర్మాణ సంస్థను ఎంపిక చేసేందుకు ప్రభుత్వం ఈ-బిడ్డింగ్‌ ద్వారా టెండర్లు ఆహ్వానించింది. దీనికి ఎల్‌ అండ్‌ టీ, షాపూర్‌జీ పల్లోంజీ సంస్థలు మాత్రమే టెండర్లు వేశాయి.

రూ.494 కోట్లకు టెండర్లను ఆహ్వానించగా షాపూర్‌జీ పల్లోంజీ సంస్థ నాలుగు శాతం ఎక్కువగా కోట్‌ చేసింది. మొత్తానికి తెలంగాణ కొత్త సచివాలయ నిర్మాణ పనులను ప్రముఖ నిర్మాణ సంస్థ అయిన షాపూర్‌జీ పల్లోంజీ దక్కించుకుంది.

మరో సంస్థ ఎల్‌ అండ్‌ టీ నిర్మాణ పనులు దక్కించుకునేందుకు 4.8 శాతం ఎక్కువగా కోట్‌ చేసింది. బుధవారం సమావేశమైన కమిషనర్‌ ఆఫ్‌ టెండర్స్‌(సీవోటీ) టెండర్‌ పత్రాలను అధ్యయనం చేయగా షాపూర్‌జీ పల్లోంజీ ఎల్‌-1గా నిలిచింది. దీంతో షాపూర్‌జీ పల్లోంజీ సంస్థకు తాజాగా ఆర్‌ అండ్‌ బీ అధికారులు సచివాలయం నిర్మాణానికి సంబంధించిన అంగీకార పత్రం అందించారు. సుమారు ఏడున్నర లక్షల చదరపు అడుగుల విస్తీర్ణంలో నిర్మించే ఈ భవన సముదాయాన్ని ఏడాదిలోగా పూర్తి చేయాలని ప్రభుత్వం షరతు విధించింది.

భవన నిర్మాణం కాక మిగిలిన ప్రదేశంలో ల్యాండ్ స్కేపింగ్, పార్కింగ్, ఇతర సదుపాయాలు ఉండనున్నాయి. ముఖ్యమంత్రి కార్యాలయం ఆరో అంతస్తులో ఉండనుంది.