Breaking News :

కెసిఆర్ కొత్త ట్విస్ట్..రైతు బంధులో మెలిక

రైతు బంధు, ఉచిత విద్యుత్ అందిస్తూ.. సాగునీటి కొరత లేకుండా అన్నదాతకు అండగా నిలుస్తోన్న తెలంగాణ సర్కారు.. రైతుకు లాభాలు అందించేలా వ్యవసాయాన్ని తీర్చి దిద్దాలని భావిస్తోంది. రైతులందరూ ఒకే పంటను సాగు చేసి గిట్టుబాటు ధర లేక ఇబ్బందుల పడే పరిస్థితిని తప్పించాలని యోచిస్తోంది. ఇందుకోసం వ్యవసాయాన్ని క్రమబద్దీకరణ చేసే దిశగా అడుగులేస్తోంది. వచ్చే ఖరీఫ్ సీజన్ నుంచే ఈ ప్రక్రియను ప్రారంభించనుంది.

వర్షాకాలం సీజన్లో 50 లక్షల ఎకరాలకు వరిసాగును పెంచాలని కేసీఆర్ సర్కారు భావిస్తోంది. ఇప్పుడు సాగు చేస్తున్న రకాలకు తోడు తెలంగాణ సోనా రకం ధాన్యాన్ని 10 లక్షలకుపైగా ఎకరాల్లో సాగు చేయాలని ప్రభుత్వం భావిస్తోంది. 50 లక్షల ఎకరాల్లో పత్తి, 10 లక్షల ఎకరాల్లో కంది పండించాలని యోచిస్తోంది.

రైతులు ఏ పంటలు పండించాలనే విషయమై ప్రభుత్వమే వారికి సూచనలు చేయనుంది. ప్రభుత్వ సలహాల మేరకు పంట సాగు చేసిన రైతులకు మాత్రమే రైతు బంధు వర్తింపజేయాలని నిర్ణయించారు. పంట కాలనీలు, ప్రత్యామ్నాయ పంటల సాగు విషయమై సీఎం కేసీఆర్ ఆధ్వర్యంలో సాగిన అత్యున్నత స్థాయి సమావేశంలో ఈ మేరకు నిర్ణయం తీసుకున్నారు. మే 15న క్షేత్రస్థాయి అధికారులతో క్షేత్రస్థాయి అధికారులతో సీఎం వీడియో కాన్ఫరెన్స్ ద్వారా చర్చించనున్నారు.

పట్టణ ప్రాంతాలకు సమీపంలో ఉన్న ప్రాంతాల్లో కూరగాయల సాగును ప్రోత్సహించాలని ప్రభుత్వం నిర్ణయించింది. ప్రాంతాల ఆధారంగా ఏయే రకాల కూరగాయలు సాగు చేయాలనే విషయంలోనూ ప్రభుత్వం సూచనలు చేయనుంది.

నూతన సమగ్ర వ్యవసాయ విధానానికి అనుగుణంగా వ్యవసాయ, మార్కెటింగ్ విభాగాలను ప్రక్షాళన చేయనున్నారు. రాష్ట్రంలో ఏయే రకాల పంటలు సాగు చేయాలనే విషయమై ప్రొఫెసర్ జయశంకర్ అగ్రికల్చర్ యూనివర్సిటీ మరింత పరిశోధనలు చేయనుంది. వ్యవసాయ సంబంధ సమస్యలపై రైతు బంధు సమితిలు రైతులతో మరింత సమన్వయంతో ముందుకెళ్లనున్నాయి.

Read Previous

కరోనాను జయించిన 113 ఏళ్ళ బామ్మ

Read Next

వైజాగ్ గ్యాస్ లీక్: ఇంటికి పది వేలు, ఈరోజే అకౌంట్లో