Breaking News :

వైజాగ్ గ్యాస్ లీక్: ఇంటికి పది వేలు, ఈరోజే అకౌంట్లో

విశాఖ గ్యాస్ లీక్ ప్రమాద బాధితులకు పరిహారం అందించే పనిలో ఉంది జగన్ సర్కార్. ఇప్పటికే మృతుల కుటుంబాలకు రూ.కోటి అందజేయగా.. అలాగే రూ.25వేలు చెక్కులు పంపిణీ చేశారు. తాజాగా ఎల్పీ పాలిమర్స్ బాధిత గ్రామాల్లో ప్రతి ఒక్కరికీ రూ.10 వేల చొప్పున వారి బ్యాంకు ఖాతాల్లో బుధవారం నుంచి అందజేయనున్నట్లు మంత్రి బొత్స సత్యనారాయణ తెలిపారు. సీఎం జగన్‌ ఇచ్చిన హామీ మేరకు గ్రామాల్లోని చిన్నారుల నుంచి వయోవృద్ధుల వరకూ ఇంట్లో ఎంతమంది ఉంటే అంతమందికీ రూ.10 వేల చొప్పు న ఇంటి యజమాని ఖాతాలో జమ చేస్తామన్నారు.

గ్యాస్‌ లీక్‌ ప్రభావిత గ్రామాల్లో వాలంటీర్లు ఇంటింటి సర్వే చేస్తున్నారన్నారు మంత్రి. ఐదు గ్రామాల్లోని ప్రజల ఆరోగ్యం కోసం ఐదు మెడికల్‌ టీమ్‌లు ఏర్పాటు చేసినట్లు చెప్పారు. గ్యాస్ లీక్ ఘటన తర్వాత 90 శాతం మంది ప్రజలు వారి గ్రామాలకు చేరుకున్నారన్నారు. పరిహారానికి సంబంధించి మరికొన్ని గ్రామాలను కూడా బాధిత గ్రామాల్లో చేర్చాలని అడుగుతున్నారని.. వాటిని పరిశీలిస్తున్నామన్నారు. ప్రస్తుతం బాధిత గ్రామాలకు మంచి నీటిని అందిస్తున్నామని, ఆయా గ్రామాల్లోని ప్రజలు యథావిధిగా తమ పనులు చేసుకోవచ్చన్నారు. ప్రజలు ఆందోళనకు గురికావొద్దని.. ప్రభుత్వం అన్ని చర్యలు చేపడుతోందన్నారు.

మరోవైపు బాధిత గ్రామాల ప్రజలు రాబోయే ఏడాది పాటు వైద్య సేవలు కోరుకుంటున్నారని.. వారికి ప్రత్యేకంగా హెల్త్ కార్డ్ ఇచ్చే ప్రక్రియను కూడా చేపడుతున్నామని మంత్రి కన్నబాబు తెలిపారు. వైఎస్ఆర్ ఆరోగ్యశ్రీలో ఇప్పటికే అవకాశం కల్పించామన్నారు. అన్యాయం జరిగిందనే భావన బాధితుల్లో కొందరు కల్పిస్తున్నారన్నారు. బాధితులు కేజీహెచ్‌లో ఎన్ని రోజులైనా ఉండవచ్చునని, చికిత్స అందిస్తామని మంత్రి భరోసా ఇచ్చారు. అదేవిధంగా కెమికల్ ప్రభావిత గ్రామ ప్రజలకు ప్రత్యేక హెల్త్ కార్డులు ఇస్తామని చెప్పారు. మెడికల్ నిపుణుల కమిటీని 10 మంది వైద్యులతో ఏర్పాటు చేశామని వివరించారు.

Read Previous

కెసిఆర్ కొత్త ట్విస్ట్..రైతు బంధులో మెలిక

Read Next

కరోనా కట్టడికి చేతులు కలిపిన మైక్రోమాక్స్ + తెలంగాణ