బాక్సాఫీస్ సంక్షోభంలో టాలీవుడ్: ‘పెద్ది’ యాసిడ్ టెస్ట్ నుంచి ‘సలార్ 2’ అంచనాల దాకా
టాలీవుడ్ ప్రస్తుతం మునుపెన్నడూ లేని గడ్డుకాలాన్ని ఎదుర్కొంటోంది. థియేట్రికల్ బిజినెస్ పరిస్థితి రోజురోజుకూ దిగజారుతుండటంతో ఎగ్జిబిటర్లు, డిస్ట్రిబ్యూటర్లు, నిర్మాతలు బహిరంగంగానే తమ ఆందోళన వ్యక్తం చేస్తున్నారు. పర్సంటేజీల పంపకాలపై నెలకొన్న వివాదాలు, తడిసి మోపెడవుతున్న నిర్వహణ ఖర్చులు, వరుసగా మూతపడుతున్న సింగిల్ స్క్రీన్లు ఇండస్ట్రీలో ఒకరకమైన టెన్షన్ వాతావరణాన్ని క్రియేట్ చేశాయి. దీనికి తోడు థియేటర్లకు వచ్చే ప్రేక్షకుల సంఖ్య దారుణంగా పడిపోయింది. ఓటీటీల దండయాత్ర ఒక ప్రధాన కారణమైతే, కంటెంట్ విషయంలో వస్తున్న అస్థిరత మరో కారణమని థియేటర్ల యజమానులు పెదవి విరుస్తున్నారు. పరిస్థితి ఇలాగే కొనసాగితే థియేటర్లను బంద్ చేయక తప్పదని కొందరు ఓపెన్ గానే వార్నింగ్ ఇస్తున్నారు.
సరిగ్గా ఇలాంటి క్లిష్ట సమయంలో జూన్ 4న ప్రేక్షకుల ముందుకు రాబోతున్న ‘పెద్ది’ సినిమా ఇండస్ట్రీలో హాట్ టాపిక్ గా మారింది. ప్రస్తుతం నడుస్తున్న ఈ సంక్షోభం, థియేటర్ల దగ్గర ఉన్న అయోమయ పరిస్థితులు ఈ సినిమా బాక్సాఫీస్ కలెక్షన్స్ పై, రిలీజ్ ప్లానింగ్ పై ఎలాంటి ప్రభావం చూపుతాయో అని ట్రేడ్ వర్గాలు లెక్కలు వేసుకుంటున్నాయి. ఒకరకంగా చెప్పాలంటే ఇది ఈ సినిమాకు పెద్ద యాసిడ్ టెస్ట్. అయితే, ఇక్కడ మరో బలమైన వాదన కూడా వినిపిస్తోంది. అందులో ఉన్న స్టార్ వాల్యూకి, దానికి తోడు పోటీగా వేరే సినిమాలు థియేటర్లలో లేకపోవడం ‘పెద్ది’కి బాగా కలిసొచ్చే అంశాలని, ఈ క్రైసిస్ ఎఫెక్ట్ దానిపై ఏమాత్రం ఉండదని గట్టి నమ్మకంతో ఉన్నారు చాలామంది.
ఇలాంటి డ్రై రన్ నుంచి ఇండస్ట్రీ బయటపడాలంటే బాక్సాఫీస్ కు ఊపునిచ్చే భారీ పాన్-ఇండియా ప్రాజెక్టుల అవసరం ఎంతైనా ఉంది. బహుశా అందుకేనేమో, తెలుగు సినిమా చరిత్రలోనే ఒక స్పెషల్ ప్లేస్ సంపాదించుకున్న ‘సలార్: పార్ట్ 1 – సీజ్ఫైర్’ సీక్వెల్ గురించి సోషల్ మీడియాలో జరుగుతున్న చర్చ నెట్టింట వైరల్ అవుతోంది. ప్రశాంత్ నీల్ డైరెక్షన్ లో వచ్చిన ఆ సినిమాలో ప్రభాస్ పవర్ ఫుల్ మాస్ అవతార్ కు జనాలు బ్రహ్మరథం పట్టారు. ఇప్పుడు దానికి కొనసాగింపుగా రాబోతున్న ‘సలార్: పార్ట్ 2 – శౌర్యాంగ పర్వం’ చుట్టూ మళ్లీ బజ్ మొదలైంది. జనవరి 25, 2026న సలార్ 2 అనౌన్స్మెంట్ టీజర్ వస్తుందనే ఒక రూమర్ ఆన్లైన్లో గట్టిగా చక్కర్లు కొడుతోంది.
ఈ వార్తలో ఎంతవరకు నిజముందో పక్కనపెడితే, మేకర్స్ నుంచి ఇప్పటిదాకా ఎలాంటి అఫీషియల్ కన్ఫర్మేషన్ లేకపోయినా ఫ్యాన్స్, సగటు సినీ అభిమానులు మాత్రం అంచనాలు పెంచేసుకుంటున్నారు. ప్రాక్టికల్ గా ఆలోచిస్తే, దర్శకుడు ప్రశాంత్ నీల్ ప్రస్తుతం హైదరాబాద్లోని రామోజీ ఫిల్మ్ సిటీలో జూనియర్ ఎన్టీఆర్తో ‘డ్రాగన్’ (వర్కింగ్ టైటిల్) షూటింగ్లో ఫుల్ బిజీగా ఉన్నాడు. మరోవైపు ప్రభాస్ రీసెంట్ మూవీ ‘ది రాజా సాబ్’ ఆశించిన స్థాయిలో మెప్పించలేక, మెజారిటీ ఆడియన్స్ కు నిరాశనే మిగిల్చింది. ఏదేమైనా, థియేటర్ల మనుగడ ప్రశ్నార్థకమవుతున్న వేళ ఈ భారీ ప్రాజెక్టులు అటు ట్రేడ్ వర్గాలకు, ఇటు ప్రేక్షకులకు ఎలాంటి అనుభూతిని ఇస్తాయో చూడాలి.
